दीपक भट्टको मुद्दामा सर्वोच्चले माग्यो विशेष र उच्च अदालतका मिसिल
कार्तिक २०। सर्वोच्च अदालतले विवादास्पद व्यवसायी दीपक भट्ट प्रतिवादी रहेको सम्पत्ति शुद्धीकरण तथा बैंकिङ कसुरसम्बन्धी मुद्दाका प्रमाण मिसिल झिकाउन आदेश दिएको छ।
बुधबार सर्वोच्च अदालतका न्यायाधीशद्वय शारंगा सुवेदी र नित्यानन्द पाण्डेयको संयुक्त इजलासले यस्तो आदेश दिएको हो।
अदालतले सम्पत्ति शुद्धीकरणसम्बन्धी मुद्दाको प्रमाण मिसिल विशेष अदालत काठमाडौंसँग माग गरेको छ। त्यसैगरी बैंकिङ कसुरसम्बन्धी मुद्दाको प्रमाण मिसिल उच्च अदालत पाटनबाट झिकाउन आदेश दिएको छ।
दीपक भट्टका तर्फबाट गैरकानुनी रूपमा थुनामा राखिएको दाबी गर्दै बन्दी प्रत्यक्षीकरणको रिट दायर गरिएको थियो। उनका बुबा चतुर्भुज भट्टले असोज ७ गते सर्वोच्च अदालतमा निवेदन दिएका थिए।
भट्टमाथि सम्पत्ति शुद्धीकरण, बैंकिङ कसुर, बीमा ऐन, धितोपत्रसम्बन्धी कसुर तथा विदेशी विनिमयसम्बन्धी कसुरको आरोपमा अनुसन्धान र मुद्दा प्रक्रिया अघि बढाइएको छ।
सर्वोच्च अदालतले तल्ला अदालतका निर्णय तथा प्रमाण अध्ययन गर्न मिसिल झिकाउने आदेश दिएपछि यो प्रकरणको न्यायिक प्रक्रिया थप चासोको विषय बनेको छ। यद्यपि मिसिल झिकाउने आदेशलाई दोषी ठहर वा थुनामुक्त गर्ने फैसला मान्न मिल्दैन।
