आलम प्रकरणमा सफाइ दिने दुई न्यायाधीशविरुद्ध न्यायपरिषदमा उजुरी
काठमाडौँ - रौतहट बम विस्फोट घटनामा नेपाली कांग्रेसका पूर्व सांसद मोहम्मद आफ्ताव आलमलगायतलाई सफाइ दिने फैसलापछि सो निर्णय सुनाउने उच्च अदालत जनकपुरको वीरगञ्ज इजलासका दुई न्यायाधीशविरुद्ध न्यायपरिषदमा छानबिनको माग गर्दै उजुरी परेको छ।
न्यायाधीश डा. खुसीप्रसाद थारु र अर्जुन महर्जनमाथि छानबिन गरी कारवाही गर्नुपर्ने माग गर्दै न्यायपरिषदमा उजुरी दर्ता गराइएको हो। उजुरी युवराज पौडेलले दर्ता गरेका हुन्।
पौडेलले उजुरीमा न्यायाधीशद्वयको कार्यक्षमता र निष्पक्षतामाथि गम्भीर प्रश्न उठाउँदै उनीहरूलाई निलम्बन गरी अनुसन्धान गर्नुपर्ने माग गरेका छन्। उनले विगतमा उनीहरूले गरेका फैसलाहरूको समेत पुनरावलोकन गर्नुपर्ने उल्लेख गरेका छन्।
