वर्षासँगैको बाढीले डाइभर्सन बग्दा बुटवल–नारायणगढ सडक अवरुद्ध
काठमाडौँ - आज (शुक्रबार) बिहानको वर्षासँगै आएको बाढीले विभिन्न स्थानमा डाइभर्सन बगाएपछि बुटवल–नारायणगढ सडक खण्ड पूर्णरूपमा अवरुद्ध भएको छ।दुम्कीबास र चोरमारामा बनेका डाइभर्सनहरू बाढीले बगाएको र पूर्वबाट पश्चिमतर्फ आउने दाउन्नेको ओरालोमा रहेको खुर्साने खोलामा सडक क्षति पुगेको इलाका प्रहरी कार्यालय, दुम्कीबासका इन्स्पेक्टर राजन तिमिल्सेनाले जानकारी दिए।
सडक अबरुद्ध हुँदा दाउन्ने, दुम्कीबास, अरुणखोला लगायतका ठाउँमा सयौं सवारी साधन बाटोमै रोकिएका छन्। इन्स्पेक्टर तिमिल्सेनाका अनुसार खोलामा पानीको सतह अझै घट्न नसकेकोले सडक खुलाउन समस्या भएको छ।
