वरिष्ठ पत्रकार विजय चालिसेको निधन, गोकर्णेश्वरमा अन्तिम संस्कार
काठमाडौँ - प्रेस चौतारी नेपालका संस्थापक अध्यक्ष तथा वरिष्ठ पत्रकार विजय चालिसेको ७४ वर्षको उमेरमा निधन भएको छ।
गोरखापत्र दैनिकका पूर्व सम्पादक समेत रहेका चालिसेको आज बिहान ९:३० बजे निधन भएको प्रेस चौतारी नेपालका केन्द्रीय अध्यक्ष गणेश पाण्डेले जानकारी दिए।
उनको पार्थिव शरीरलाई आज बिहान अन्तिम श्रद्धाञ्जलीका लागि राखिएको थियो। अन्तिम संस्कार गोकर्णेश्वर घाटमा सम्पन्न हुने पाण्डेले जानकारी दिए। प्रेस चौतारी नेपालले पत्रकारहरूलाई अन्तिम श्रद्धाञ्जलीका लागि उपस्थित हुन अनुरोध गरेको छ।
चालिसे नेपाली पत्रकारिता, साहित्य तथा सामाजिक चेतनाको क्षेत्रमा दशकौं अघिदेखि सक्रिय थिए। प्रेस स्वतन्त्रताको पक्षमा दृढ रूपमा उभिने अग्रणी व्यक्तित्वका रूपमा उनको चिनारी रहँदै आएको छ।
