नवलपरासीको अम्रसा जङ्गलमा मोटरसाइकल दुर्घटनामा दुई जनाको मृत्यु, एक गम्भीर घाइते
काठमाडौं - नवलपरासी (बर्दघाट सुस्तापूर्व)को मध्यविन्दु नगरपालिका–७ स्थित अम्रसा जङ्गलमा आज बिहान भएको मोटरसाइकल दुर्घटनामा दुई जनाको मृत्यु भएको छ भने एक जना गम्भीर घाइते भएका छन्।
प्रहरीका अनुसार, अम्रसा गाउँबाट चोरमारातर्फ आउँदै गरेको लु९प ८११६ नम्बरको मोटरसाइकल अनियन्त्रित भई दुर्घटना भएको हो। दुर्घटनामा परी मध्यविन्दु–७ चोरमारा निवासी २४ वर्षीय नवीन कुमाल र सोही स्थानका २२ वर्षीय रादिम मिधुनको घटनास्थलमै मृत्यु भएको छ। मोटरसाइकलमा सवार २८ वर्षीय मनिष घर्तीमगर गम्भीर घाइते भएका छन्। उनलाई उपचारका लागि नयाँ मेडिकल कलेज चितवन लगिएको छ।
प्रहरी उपरीक्षक यादव ढकालका अनुसार, तीनै जना टायल मार्बलसम्बन्धी मिस्त्रीका रूपमा कार्यरत थिए र कामका लागि जाँदै गर्दा दुर्घटनामा परेका हुन्।
