सर्लाहीमा भारतीय नम्बर प्लेटको स्कार्पियो गाडीबाट १५ लाखको सुनचाँदी बरामद
काठमाडौं - सर्लाही जिल्लाको लालबन्दी नगरपालिका-१ स्थित पूर्व-पश्चिम लोकमार्गमा आइतबार बिहान ट्राफिक प्रहरीको चेकजाँचका क्रममा भारतीय नम्बर प्लेटको स्कार्पियो गाडीमा १५ लाख रुपैयाँ मूल्य बराबरका सुनचाँदीका गहना बरामद भएका छन्।
बीआर ३० एके ७२२० नम्बरको उक्त गाडीमा विभिन्न किसिमका सुनचाँदीका गहना फेला परेका छन्। गाडीमा भन्सार कागजात नभएको र चालकले मदिरा सेवन गरेको अवस्थामा फेला परेपछि गाडीलाई नियन्त्रणमा लिइएको थियो। चालकले अर्को चालक बोलाएर गाडी छाडेर भागेका थिए।
गाडीको खानतलासी गर्दा इन्जिनको भागमा प्लास्टिकले बेरेको झोलामा गहना र गाडीको अन्य भागबाट पनि चाँदी र नगद गरी करिब १५ लाख रुपैयाँ बराबरको सरसामान बरामद भएको छ। बरामद गाडी र सामानलाई आवश्यक कारबाहीका लागि सर्लाही भन्सार कार्यालय, मलंगवामा पठाइएको जिल्ला प्रहरी कार्यालय सर्लाहीले जनाएको छ।
