तीनकुने घटनामा ६१ जना विरुद्ध मुद्दा दर्ता, ५० जना राज्यविरुद्धको कसुरमा प्रतिवादी
काठमाडौं - काठमाडौँको तीनकुनेमा १५ चैतमा भएको हिंसात्मक प्रदर्शनमा संलग्न रहेको अभियोगमा ६१ जनाविरुद्ध मुद्दा दर्ता भएको छ। जिल्ला सरकारी वकिल कार्यालय काठमाडौँका प्रमुख रामहरि शर्मा पोखरेलका अनुसार, ५० जनालाई राज्यविरुद्धको कसुरसमेतमा प्रतिवादी बनाइएको छ। अरु ११ जनालाई आपराधिक उपद्रवमा मात्रै छुट्टै मुद्दा दायर गरिएको छ। यस्तै दुर्गा प्रसाईंसहित ८ जनालाई भने कर्तव्य ज्यान र ज्यान मार्ने उद्योगमा पनि प्रतिवादी बनाइएको छ।
यस घटनामा राप्रपाका वरिष्ठ उपाध्यक्ष रवीन्द्र मिश्र र महामन्त्री धवलशमशेर राणा सहितका नेताहरूलाई राज्यविरुद्धको कसुर, आपराधिक उपद्रव र संगठित अपराधको आरोपमा प्रतिवादी बनाइएको छ। यस्तै, दुर्गा प्रसाईं सहित ८ जनालाई कर्तव्य ज्यान र ज्यान मार्ने उद्योगमा पनि प्रतिवादी बनाइएको छ।
प्रहरीले यस घटनामा संलग्न रहेको आरोपमा करिब डेढसय जनालाई पक्राउ गरेको भएपनि संलग्नता नदेखिएका र ठूलो कसुर नगरेकाहरुलाई छाडेको थियो। सरकारी वकिल कार्यालयले ती मध्ये पनि ६५ जनालाई मात्रै मुद्दा चलाएको हो।
