सांसद सुमना श्रेष्ठको आरोप : “मिटरव्याजपीडितलाई राज्यले गिजोलिरहेको छ”
काठमाडौं - राष्ट्रिय स्वतन्त्र पार्टी (रास्वपा) की सांसद सुमना श्रेष्ठले मिटरव्याजपीडितको समस्याप्रति राज्य बेवास्ता गर्दै गिजोलिरहेको आरोप लगाएकी छन्। उनले सिंहदरबारमा पीडितले न्याय माग्न गएका बेला “नो इन्ट्री” भन्ने व्यवहार देखिएको भन्दै सरकारप्रति आक्रोश व्यक्त गरिन्।
आज (मंगलबार) प्रतिनिधिसभाको बैठकमा बोल्दै श्रेष्ठले सरकार र सम्बन्धित निकायहरूले पीडितको समस्या समाधान गर्नुको सट्टा उल्टै आयोगमाथि आयोग थपेर पीडितलाई झनै अन्योलमा पारेको बताइन्।
“आफ्नो पार्टीको साहु तथा महाजन जोगाउन पीडितमाथि राजनीति नगरौँ,” भन्दै श्रेष्ठले गृहमन्त्रीदेखि सांसदसम्म मिटरव्याजको संरचनामा संलग्न हुनसक्ने आशंका हुने गरी काम नहोस् भनेर चेतावनी दिइन्।
उनले स्पष्ट शब्दमा भनिन्, “मिटरव्याज पीडितलाई न्याय चाहिएको हो, राजनीति होइन।”
