ओली र देउवाबीच भेटवार्ता: राष्ट्र बैंकको गभर्नर नियुक्तिसम्बन्धी छलफल
काठमाडौं - प्रधानमन्त्री तथा नेकपा एमाले अध्यक्ष केपी शर्मा ओली र सत्ता साझेदार नेपाली कांग्रेसका सभापति शेरबहादुर देउवाबीच समसामयिक राजनीतिक विषयमा भेटवार्ता भएको छ। प्रधानमन्त्री निवास बालुवाटारमा भएको भेटवार्तामा नेपाल राष्ट्र बैंकको गभर्नर नियुक्तिसम्बन्धी विषयमा विशेष छलफल भएको प्रधानमन्त्री ओलीको सचिवालयले जानकारी दिएको छ।
यसअघि सोमबार भेट गर्ने तय भए पनि प्रधानमन्त्री ओली अस्वस्थ भएकाले भेट स्थगित गरिएको थियो। मंगलबार पुनः तय भएको भेटमा लामो समयदेखि रिक्त रहेको गभर्नर पदमा नियुक्ति प्रक्रिया अघि बढाउने विषयमा कुराकानी भएको हो। गएको चैत २४ गते गभर्नर महाप्रसाद अधिकारीको पाँच वर्षे कार्यकाल सकिएपछि राष्ट्र बैंक नेतृत्व रिक्त रहेको छ। संविधानअनुसार गभर्नर नियुक्तिका लागि गठित सिफारिस समितिले तीनजनाको नाम सिफारिस गर्नुपर्नेछ, जसको संयोजक अर्थमन्त्री विष्णु पौडेल छन्।
सभापति देउवाले यसअघि नै गभर्नर पदका लागि अर्थविद् प्रा.डा. विश्व पौडेलको नाम प्रस्ताव गरेका थिए। प्रारम्भिक छलफलमा राष्ट्र बैंककै कार्यकारी निर्देशक डा. गुणाकर भट्टको नाम पनि अगाडि आएको भए पनि प्रधानमन्त्री ओली त्यसमा सकारात्मक थिएनन्।गभर्नर नियुक्तिसम्बन्धी प्रक्रिया एक महिनाअघि नै थालिनुपर्ने भए पनि हालसम्म सिफारिस समिति बैठक बस्न सकेको छैन। अब प्रधानमन्त्री र सभापति देउवाबीचको सहमतिपछि प्रक्रिया अघि बढ्ने अपेक्षा गरिएको छ।
