सावित्रा भण्डारीको सम्मानमा मर्स्याङ्दी गाउँपालिका–९ मा 'साम्बा चोक' नामाकरण
काठमाडौं - मर्स्याङ्दी गाउँपालिका–९, पामचोकका चर्चित महिला फुटबल खेलाडी सावित्रा भण्डारीको सम्मानमा आज एक विशेष कार्यक्रमका बीच खुदीपुल वारीको चोकलाई 'साम्बा चोक' नामाकरण गरिएको छ।
गाउँपालिका अध्यक्ष अर्जुन गुरुङले सावित्राको योगदानको कदर गर्दै उक्त क्षेत्रलाई 'साम्बा चोक' नामाकरण गरिएको घोषणा गरे। उनका अनुसार, सावित्राको फोटोसहितको होर्डिङ बोर्ड राखेर औपचारिक रूपमा नामाकरण गरिनेछ। यसले सावित्राको जन्मस्थानको पहिचान र प्रचारमा थप टेवा पुग्ने विश्वास व्यक्त गरिएको छ।
प्रमुख जिल्ला अधिकारी माधवप्रसाद पोखरेलले सावित्राजस्तो व्यक्तिका नाममा चोकको नामाकरण हुँदा उनको योगदानको कदर भएको र जिल्लावासीका लागि पनि गौरवको कुरा भएको बताए। उनले सशस्त्र प्रहरी बलको पनि यसमा भूमिका रहेको उल्लेख गरे।
सावित्रा भण्डारी, जसलाई 'साम्बा' उपनामले चिनिन्छन्, सशस्त्र प्रहरी बल क्लबबाट व्यावसायिक फुटबल खेल्न सुरु गरेकी हुन्। हाल उनी नेपाली महिला फुटबल टोलीको सर्वाधिक गोलकर्ता छिन् र अन्तर्राष्ट्रिय प्रतियोगितामा सर्वाधिक गोल गर्ने नेपाली खेलाडी पनि हुन्। उनले माल्दिभ्स, भारत र इजरायलमा व्यवसायिक फुटबल खेलेकी छिन् भने हाल फ्रान्सेली क्लब एन अभान्ट ग्वेङगाम्पबाट व्यवसायिक फुटबल खेलिरहेकी छिन्।
