राज्यमन्त्री विकको भनाइ: 'वायु प्रदूषण नियन्त्रणका लागि तत्काल कदम आवश्यक'
काठमाडौँ - वन तथा वातावरण राज्यमन्त्री रुपा विकले तीव्र सहरीकरण र जनसंख्या वृद्धिका कारण वायुको गुणस्तर खस्किएको उल्लेख गर्दै यसको नियन्त्रणका लागि तत्काल कदम चाल्नुपर्ने आवश्यकता औंल्याएकी छन्। उनले वायु प्रदूषणलाई हाम्रो समयको सबैभन्दा जटिल विकास चुनौती मान्दै यसले स्वास्थ्य, वातावरण र अर्थतन्त्रमा गहिरो असर पुर्याइरहेको बताइन्।
आज आयोजित 'जलवायु न्याय कार्य र दिगो विकासमा वित्तीय चुनौतीको समाधान' विषयक उच्चस्तरीय सत्रमा बोल्दै उनले भनिन्, ‘वन डढेलोले पनि वायु प्रदूषणमा योगदान पुर्याइरहेको छ, मानिसहरू गाउँ छोड्दै गएका छन् र वनको उचित व्यवस्थापन हुन नसकेका कारण बाँकी रहेको जैविक पदार्थले वन डढेलोलाई बढावा दिइरहेको छ’। उनले थपिन्, “दक्षिण एसिया विश्वव्यापी वायु प्रदूषणको केन्द्रबिन्दु बनेको छ र यसका धेरै सहरहरू विश्वका सबैभन्दा प्रदूषित सहरहरूमा गनिन्छन्।”
