जडीबुटी चोकदेखि पेप्सीकोला चोकसम्मका अनधिकृत संरचना हटाउन ३५ दिने म्याद
काठमाडौँ - काठमाडौं महानगरपालिका र सडक विभागले जडीबुटी चोक (अरनिको राजमार्ग) देखि पेप्सीकोला चोकसम्मको सडक सीमा क्षेत्रका अनधिकृत संरचना हटाउन निर्देशन दिएका छन्। सोमबार जारी संयुक्त सूचनामा सार्वजनिक सडक ऐन २०३१ को दफा १९ अनुसार नक्सा पास विपरीत निर्माण गरिएका संरचनाहरूलाई ३५ दिनभित्र हटाउन भनिएको छ।
सूचनामा भनिएको छ कि उक्त क्षेत्रको सडकको केन्द्र रेखाबाट दायाँ र बायाँ १५-१५ मिटरको क्षेत्रफल कायम गरिएको छ। यस क्षेत्रमा अनधिकृत संरचना निर्माण गर्ने व्यक्तिहरूलाई ३५ दिनभित्र ती संरचनाहरू हटाउन वा भत्काउन भनिएको छ। यदि तोकिएको म्यादभित्र अनधिकृत संरचनाहरू हटाइएन भने सार्वजनिक सडक ऐन २०३१ र स्थानीय सरकार सञ्चालन ऐन २०७४ अनुसार कारबाही गरिने उल्लेख छ।
