मकवानपुरको राक्सिराङमा बोलेरो जिप दुर्घटना, ९ जना घाइते
काठमाडौँ - मकवानपुरको राक्सिराङ गाउँपालिका–९ अठारेस्थित भित्री सडकखण्डमा आज बिहान बोलेरो जिप दुर्घटना हुँदा ९ जना घाइते भएका छन्। दुर्घटनामा परेका मध्ये ६ जनाको अवस्था गम्भीर रहेको प्रहरीले जनाएको छ।
प्रहरी प्रवक्ता डिएसपी श्यामु अर्यालका अनुसार, राक्सिराङको खैराङबाट मनहरीतर्फ आउँदै गरेको बा १५ च १३३३ नम्बरको बोलेरो जिप आज बिहान करिब ८ः१५ बजे अनियन्त्रित भई करिब ५० मिटर तल खसेको थियो।
घटनास्थलमा प्रहरी निरीक्षक भरत कुमार खड्काको नेतृत्वमा पुगेको टोलीले घाइतेहरूको उद्धार गरी मनहरी अस्पताल पठाएको छ। बोलेरोमा चालकसहित ९ जना सवार रहेको मकवानपुर प्रहरीले जनाएको छ।
गम्भीर घाइतेहरूको नामावलीमा राक्सिराङ ९ का १६ वर्षीय हिमाल बस्नेत, ३५ वर्षीय बुद्धिमान घलान, ७५ वर्षीय डिल ब. घलान, ६५ वर्षीय फूलमाया घलान, ३८ वर्षीय रूपबहादुर राउत र ४८ वर्षीय दीपक खड्का रहेका छन्। उनीहरूको टाउको तथा शरीरका विभिन्न भागमा चोट लागेको प्रहरीले जनाएको छ।
यसैगरी, ५० वर्षीय सूर्य अधिकारी, १४ वर्षीय कुमार तामाङ र २८ वर्षीय सुजन तामाङ पनि घाइते भएका छन्। उनीहरूको अवस्था मध्यम रहेको प्रहरी प्रवक्ता अर्यालले जानकारी दिए।
घटनाको कारण र थप विवरणका लागि प्रहरीले अनुसन्धान जारी राखेको जनाएको छ।
