नेकपा एमाले केन्द्रीय सचिवालय बैठक आज, नीति तथा कार्यक्रम र बजेटमा छलफल हुने
काठमाडौँ - नेकपा एमालेको केन्द्रीय सचिवालय बैठक आज आइतबार दिउँसो पार्टी केन्द्रीय कार्यालय च्यासलमा बस्दैछ। बैठकमा सरकारको नीति तथा कार्यक्रम र आगामी आर्थिक वर्षको बजेटका विषयमा छलफल हुने प्रमुख एजेण्डा रहेको छ।
पार्टीका प्रचार विभाग प्रमुख राजेन्द्र गौतमका अनुसार, बैठकमा सरकारका नीति तथा कार्यक्रम र बजेटका विषयमा गम्भीर छलफल हुनेछ। यसअघि, राष्ट्रपति रामचन्द्र पौडेलले शुक्रबार संसदमा आगामी आर्थिक वर्षको नीति तथा कार्यक्रम प्रस्तुत गरेका थिए। सोही आधारमा जेठ १५ गते सरकारले आगामी आर्थिक वर्षको बजेट पेश गर्ने तयारी गरेको छ।
यसका साथै, बैठकमा पार्टीका पूर्व उपाध्यक्ष डा. भीम रावल, स्थायी कमिटी सदस्य बिन्दा पाण्डे र केन्द्रीय सदस्य उषाकिरण तिम्सिनाको कारबाहीको समीक्षा र सम्भावित फुकुवा विषयमा पनि छलफल हुने सम्भावना छ। यसअघि, पाण्डे र तिम्सिनालाई पार्टीको निर्णयविपरीत सार्वजनिक अभिव्यक्ति दिएको भन्दै ६ महिनाका लागि जिम्मेवारीबाट मुक्त गरिएको थियो।
