एमनेस्टी इन्टरनेशनल नेपालद्वारा 'विश्व मानव अधिकार अवस्था' प्रतिवेदन सार्वजनिक
काठमाडौँ - एमनेस्टी इन्टरनेशनल नेपालले मंगलबार काठमाडौँमा आयोजित कार्यक्रममा 'विश्व मानव अधिकार अवस्था' शीर्षकको वार्षिक प्रतिवेदन सार्वजनिक गरेको छ। यो प्रतिवेदनले १५५ देशहरूको मानव अधिकार अवस्थाको मूल्याङ्कन गर्दै, 'ट्रम्प प्रभाव'ले विश्वव्यापी मानव अधिकार संकटलाई तीव्र बनाएको चेतावनी दिएको छ।
एमनेस्टी इन्टरनेशनल नेपालका अध्यक्ष बिपिन बुधाथोकीले प्रतिवेदनको विमोचन गर्दै, 'ट्रम्प प्रभाव'ले सरकारहरूको दमन, असहमति दमन, र अन्तर्राष्ट्रिय कानूनी संरचनामा कमजोरी ल्याएको बताएका छन्। नेपालमा पनि, सुरक्षा बलहरूको अत्यधिक बल प्रयोग, अभिव्यक्ति स्वतन्त्रतामा प्रतिबन्ध, र लैंगिक तथा जातीय भेदभावको समस्या औंल्याइएको छ। यद्यपि, २०२३ मा समलिङ्गी दम्पतीको विवाह दर्ता गरिनु सकारात्मक प्रगति भएको देखिन्छ।
एमनेस्टीले सबै सरकारहरूलाई मानव अधिकारको संरक्षण र प्रवर्धन गर्न अन्तर्राष्ट्रिय कानूनी दायित्वको पालना गर्न आग्रह गरेको छ।
