प्रतिनिधिसभा बैठक मंगलबारसम्मका लागि स्थगित
काठमाडौँ - प्रतिनिधि सभाको बैठक सोमबार स्थगित गरिएको छ र अब मंगलबार बिहान ११ बजे बस्ने जानकारी सभामुख देवराज घिमिरेले दिएका छन्। सोमबारको बैठकमा आकस्मिक र शून्य समयमा नेताहरूले धारणा राखेका थिए।
बैठकमा 'नेपालको संविधानको धारा ५३ र सुशासन (व्यवस्थापन तथा सञ्चालन) ऐन, २०६४ को दफा ४१ बमोजिमको नेपाल सरकारको वार्षिक प्रतिवेदन आर्थिक वर्ष २०७९/८० र २०८०/८१' पेस गरिएको थियो। संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले 'नेपाल नागरिक उड्डयन प्राधिकरण, २०८१' माथि विचार गरियोस् भन्ने प्रस्ताव पेस गरेका थिए। उनको प्रस्तावमा सैद्धान्तिक छलफल भएको थियो र सांसदहरूले उठाएका प्रश्नहरूको जवाफ दिएपछि उक्त विधेयक स्वीकृत भएको थियो। त्यसपछि विधेयकमाथि ७२ घण्टाभित्र संशोधन प्रस्ताव मागिएको छ।
बैठकको चौथो कार्यसूचीमा 'शहीद दशरथ चन्द स्वास्थ्य विज्ञान विश्वविद्यालय विधेयकमाथि छलफल गरियोस् भन्ने प्रस्ताव पेस गर्ने' र 'पारित गरियोस् भन्ने प्रस्ताव पेस गर्ने' कार्यसूची थियो। तर, उक्त कार्यसूची हटाएर सभामुख घिमिरेले बैठक मंगलबारसम्मका लागि स्थगित गरेका छन्।
