बुधबार इजरायलमाथि मिसाइल प्रहार
काठमाडौँ - यमनका हुथी विद्रोहीहरूले बुधबार इजरायलको उत्तरतर्फ मिसाइल प्रहार गरेका छन्। यस आक्रमणले हाइफा, क्रायोट र अन्य क्षेत्रहरूमा साइरन बज्न थालेका थिए। इजरायली सेनाले उक्त मिसाइललाई आकाशमै नष्ट गरेको जनाएको छ। हुथी समूहले अहिलेसम्म आक्रमणको जिम्मेवारी लिएका छैनन्।
अमेरिकाले मार्च १५ देखि हुथी विद्रोहीहरूलाई लक्ष्य गर्दै हवाई आक्रमण तीव्र पारेको छ। तर, हुथीहरू आफ्नो गतिविधिबाट टसका मस भएका छैनन्। इजरायलले गाजामा गरेको आक्रमणको प्रतिकारमा हुथीहरूले लाल सागर भएर जाने जहाजहरूलाई निशाना बनाइरहेका छन्। यसलाई रोक्न अमेरिकाले हुथी विद्रोहीहरूमाथि कारबाही सुरु गरेको थियो।
