झलनाथ खनालले महाकालीमा भारतीय पक्षबाट भइरहेको सीमा अतिक्रमण रोक्न आग्रह
काठमाडौँ - पूर्वप्रधानमन्त्री तथा नेकपा एकीकृत समाजवादीका सम्मानित नेता झलनाथ खनालले महाकाली नदीको सीमामा भारतीय पक्षबाट भइरहेको तटबन्ध निर्माणलाई नेपाली भूमि अतिक्रमणको प्रयास भन्दै तत्काल रोक्न आग्रह गरेका छन्। उनका अनुसार, २०७० को बाढीका कारण महाकाली नदीको धार परिवर्तन भएर करिब ४० रोपनी नेपाली भूमि भारतीय पक्षको नियन्त्रणमा गएको छ। यस भूमिमा भारतीय पक्षले तटबन्ध निर्माण गरिरहेको जानकारी प्राप्त भएको खनालले बताएका छन्।
खनालका अनुसार, दार्चुला जिल्लाको खलंगास्थित स्थानीय प्रशासन र जनताले उक्त भूभाग नेपालको भएको भन्दै विरोध जनाए पनि भारतीय पक्षले बेवास्ता गर्दै निर्माण कार्य जारी राखेको छ। यसबाट सीमा क्षेत्रमा तनाव बढ्दै गएको र स्थानीय जनता प्रतिरोधमा उत्रन थालेको खनालको भनाइ छ।
उनले नेपाल सरकारलाई केन्द्रीय नापजाँच टोली पठाएर सिमानाको स्पष्टता गर्न र भारतीय पक्षसँग कूटनीतिक वार्ता गरी तटबन्ध निर्माण रोक्न आग्रह गरेका छन्। अन्यथा, यस घटनाले देशव्यापी विरोध र प्रतिरोधको श्रृंखला विकास हुन सक्ने उनले चेतावनी दिएका छन्।
