काठमाडौँ । शिवरात्रिको अवसरमा अभिनेत्री मनीषा कोइरालाको आवाज रहेको पहिलो भजन सार्वजनिक गरिएको छ । 

महामृत्युञ्जय मन्त्र समावेश भएको उक्त भजन मनीषाको आवाजमा रेकर्ड भएको पहिलो गीत हो। यो गीत र भिडियोलाई प्रख्यात वाद्यवादन समूह ‘सुरसुधा’ले तयार पारेको हो ।

गीतको भिडियोमा मनीषा स्वयम फिचर्ड छिन् । यस मन्त्र गायनमा मनीषासहित सुरसुधाकै गायिका सरस्वती खत्री र सुरेन्द्र श्रेष्ठको पनि आवाज रहेको छ।  

गीतमा सितार, बाँसुरी, तबला र गितारसहितको बाजको मिश्रण गरिएको छ । पाका एरेन्जर दीप तुलाधरको सहयोग लिएर चेलो र भायोलिनको आवाजलाई पनि यसमा समेटिएको छ ।

मनीषाले भविष्यमा पनि यस्तै आध्यात्मिक गीतहरु गाउने चाहना देखाएकी छिन् । विहिबार नेपालसँगै उक्त गीतलाई मुम्बइस्थित टाइम्स म्युजिकले एकसाथ प्रसारण गर्ने भएको छ ।