बाढीमा मृत्यु हुनेको संख्या ७३४ पुग्यो, २ हजार ४९८ जना अझै सम्पर्कविहीन
२०८३ भदौ १४ गते, आइतबार। तिब्बत क्षेत्रबाट रसुवाको भोटेकोशी हुँदै त्रिशूली नदीमा आएको बाढीमा परी मृत्यु हुनेको संख्या ७३४ पुगेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार आइतबार बिहान ९ बजेसम्म विभिन्न स्थानबाट ७३४ जनाको शव फेला परेको हो।
प्राधिकरणका अनुसार रसुवामा १३, नुवाकोटमा ५२, धादिङमा ५०, नवलपरासी पूर्वमा १८४, नवलपरासी पश्चिममा ८२, तनहुँमा ३६ र चितवनमा २५९ जनाको शव फेला परेको छ।
बाढीमा परी २ हजार ४९८ जना अझै सम्पर्कविहीन छन्। तीमध्ये नेपाल प्रहरीका २७, नेपाली सेनाका ४५, सशस्त्र प्रहरी बलका १३, भन्सार कार्यालयका १५ र अध्यागमन कार्यालयका ४ जना रहेका छन्।
त्यस्तै रसुवाका ५६२ र नुवाकोटका ११५ जना सम्पर्कविहीन छन्। विभिन्न जलविद्युत् आयोजनाबाट ९३३ जना, मकवानपुरका ६५ जना तथा ५९८ जना विदेशी नागरिक सम्पर्कविहीन रहेको प्राधिकरणले जनाएको छ। विदेशी पर्यटकसँगै घुम्न गएका १२७ नेपाली नागरिक र लाङटाङ राष्ट्रिय निकुञ्जका ३ जना पनि सम्पर्कविहीन छन्।
