एसीसी प्रिमियर कपमा नेपालको शानदार सुरुआत, सन्दीपको पाँच विकेटपछि बहराइन ८७ रनमै अलआउट
सोमबार, १५ भदौ। मलेसियामा जारी एसीसी मेन्स प्रिमियर कप २०२६ को आफ्नो पहिलो खेलमा नेपालले बहराइनविरुद्ध बलिङतर्फ उत्कृष्ट प्रदर्शन गरेको छ। बंगिमा भएको खेलमा टस हारेर पहिले ब्याटिङ गरेको बहराइनलाई नेपाली बलरहरूले ३६.२ ओभरमा मात्र ८७ रनमा अलआउट गरेका हुन्।
नेपालका कप्तान सन्दीप लामिछानेले १० ओभरमा चार मेडनसहित १४ रन खर्चेर पाँच विकेट लिएपछि बहराइनको इनिङ्स धराशायी भएको हो। कप्तानका रूपमा पुनरागमन गरेका सन्दीपले पहिलो बलमै विकेट लिएर खेलमा आफ्नो प्रभाव देखाएका थिए। त्यसअघि तीव्र गतिका बलर करण केसीले दुई विकेट लिएर बहराइनको सुरुआती ब्याटिङमाथि दबाब सिर्जना गरेका थिए।
बहराइनका लागि फियाज अहमदले १५ बलमा १५ रन बनाएर सर्वाधिक योगदान दिए पनि अन्य ब्याटरहरूले ठूलो साझेदारी बनाउन सकेनन्। बहराइनले दिएको ८८ रनको सामान्य लक्ष्य पछ्याउँदै नेपालले जवाफी ब्याटिङ सुरु गरेको छ। प्रतियोगितामा नेपाल यसपटक उपाधि जित्दै २०२७ को एसिया कपमा स्थान सुरक्षित गर्ने लक्ष्यमा रहेको छ।
एसीसी प्रिमियर कपको उद्घाटन संस्करणको च्याम्पियनसमेत रहेको नेपालका लागि बहराइनविरुद्धको यो खेल प्रतियोगिताको सुरुआत बलियो बनाउने महत्वपूर्ण अवसर बनेको छ।
