सउल।  विभिन्न प्रवेशाज्ञा (भिसा) मा दक्षिण कोरिया आई काम गर्ने र काम गर्न चाहेर भिसा परिवर्तन गरि समयावधि थप गर्न चाहने नेपाली लगायत कोरियामा रहेका अन्य विदेशी कामदारको भिसा १३ महिना थप्न मिल्ने भएको छ। 

कोभिड–१९ का कारण भिसा सकिएर स्वदेश फर्किने अवस्था नभएका कामदारलाई भिसा थप गरी अस्थायी मौसमी कामदारको रुपमा काम गर्न अनुमति दिने न्याय मन्त्रालयलले जनाएको छ। भिसा थप हुनेमा एफ–१ (भ्रमण तथा पारिवारिक भिसा), एफ–३ (डिपेन्डेन्ट भिसा), एच–२ (भ्रमण तथा काम गर्ने भिसा), ई–९ (रोजगार अनुमति भिसा) आदि पर्नेछन्।  यो नियम यही मार्च २ देखि लागू हुने बताइएको छ । 

यो प्रक्रियामार्फत निवेदन दिने कामदारको सन् २०२२ को मार्च ३१ सम्म १३ महिनाका लागि अस्थायी भिसा थप हुनेछ । अस्थायी भिसा प्राप्त गर्ने कामदारले कृषि तथा मत्स्यपालनमा काम गर्ने अनुमति प्राप्त गर्ने छन् । कोभिडका कारण लामो समयदेखि विदेशी कामदार नभित्रिदा भएको कामदारको अभावलाई पूर्ति गर्न पनि सो नियम ल्याइएको मन्त्रालयले जनाएको छ । 

कोरियाले अस्थायी मौसमी कामदारको रुपमा गत वर्ष ७९ हजारको भिसा थप गर्ने तयारी गरेको छ । त्यसैगरी मौसमी कामदारको रुपमा ९० दिनभन्दा धेरै भिसा प्राप्त गरेका कोरियाली मूलका विदेशी नागरिकले विभिन्न शुल्कमा छुट पाउने बताइएको छ । यसैगरी नेपालमा कोरियाको लागि श्रम सम्झौताको पर्खाइ गरी रोस्टरमा बसेकाको अवधि छ महिना थप हुने भएको छ । सो कुराको जानकारी कोरिया रोजगार तथा श्रम मन्त्रालयको प्रवासी श्रमिक विभागका सचिव ई ग्यांग सुनले दिएका हुन् ।

रोजगार अनुमति प्रणाली  (इपिएस) अन्तर्गत भाषा परीक्षा उत्तीर्ण गरी कोरिया काम गर्न जानको लागि रोजगारदाताको र छनोटमा पर्न योग्य १६ देशको प्रवासी श्रमिकलाई रोस्टरमा राखिन्छ र दुई वर्षसम्म पनि उनीहरू छनोटमा नपरे स्वतः रद्द हुन्छन् । कोरोना महामारीका कारण दुई वर्षको अवधिभित्र श्रम सम्झौता पत्र नआएर २०२० नोभेम्बेर १ देखि रोस्टर अवधि सकिएकालाई पुनः छ महिना अवधि थपिएको हो ।