देशभर हरिबोधिनी एकादशी मनाइँदै, विष्णु मन्दिरमा भक्तजनको घुइँचो
मंसिर ५। भगवान् विष्णुको आराधनासँग सम्बन्धित महत्त्वपूर्ण धार्मिक पर्व हरिबोधिनी एकादशी आज देशभर श्रद्धा र भक्तिपूर्वक मनाइँदै छ। यस अवसरमा भक्तजनले व्रत बस्ने, नदी तथा कुण्डमा स्नान गर्ने र विष्णु भगवान्को पूजा–आराधना गर्ने परम्परा छ। काठमाडौं उपत्यकाका चाँगुनारायण, विशंखुनारायण, शेषनारायण तथा इचंगुनारायण मन्दिरलगायत देशभरका विष्णु मन्दिरमा भक्तजन पुग्ने गरेका छन्। धार्मिक मान्यताअनुसार आषाढ शुक्ल एकादशीदेखि चार महिनासम्म योगनिद्रामा रहनुभएका भगवान् विष्णु यस दिन जागा हुने विश्वास गरिन्छ। भोलिपल्ट तुलसी विवाह गर्ने परम्परा पनि रहेको छ।









