आज देशभरको मौसम कस्तो रहला?
२७ कात्तिक। देशमा पश्चिमी वायुको आंशिक प्रभाव रहेकाले आज देशका विभिन्न क्षेत्रमा मौसममा सामान्य बदली रहने जल तथा मौसम विज्ञान विभागले जनाएको छ।
विभागका अनुसार आज दिउँसो हिमाली तथा पहाडी भूभागमा आंशिक बदली रहनेछ भने तराईका अधिकांश स्थानमा मौसम मुख्यतया सफा रहनेछ। कोशी, बागमती र गण्डकी प्रदेशका हिमाली तथा पहाडी भूभागका केही स्थानमा हल्का वर्षा तथा हिमपातको सम्भावना रहेको छ। त्यस्तै कर्णाली र सुदूरपश्चिम प्रदेशका हिमाली क्षेत्रमा पनि हल्का हिमपात हुन सक्ने अनुमान गरिएको छ।
आज राति पनि हिमाली तथा पहाडी क्षेत्रमा आंशिक बदली रहनेछ भने तराई क्षेत्रमा मौसम मुख्यतया सफा रहने विभागले जनाएको छ।
यसैबीच तराईका केही स्थान, उपत्यका तथा नदी आसपासका क्षेत्रमा बिहानको समयमा हुस्सु र कुहिरो लाग्ने सम्भावना रहेकाले हवाई तथा सडक यातायातमा सावधानी अपनाउन मौसमविद्हरूले सुझाव दिएका छन्।
