नेपालको सार्वजनिक ऋण ३० खर्ब नाघ्यो, प्रत्येक नेपालीको थाप्लोमा एक लाखभन्दा बढी ऋणभार
कात्तिक १४ — नेपालको सार्वजनिक ऋण ३० खर्ब रुपैयाँ नाघेको छ। सार्वजनिक ऋण व्यवस्थापन कार्यालयको तथ्यांकअनुसार चालु आर्थिक वर्ष २०८३/८४ को असोज मसान्तसम्म मुलुकको कुल सार्वजनिक ऋण ३० खर्ब ९ अर्ब ११ करोड ६६ लाख रुपैयाँ पुगेको हो।
कुल सार्वजनिक ऋणमध्ये वैदेशिक ऋण १५ खर्ब ९८ अर्ब ८० करोड रुपैयाँ अर्थात् ५३.१३ प्रतिशत रहेको छ भने आन्तरिक ऋण १४ खर्ब १० अर्ब ३१ करोड रुपैयाँ अर्थात् ४६.८७ प्रतिशत रहेको छ।
चालु आर्थिक वर्षको पहिलो तीन महिनामा मात्रै सरकारले १ खर्ब २३ अर्ब ३२ करोड रुपैयाँ ऋण थपेको छ। यस अवधिमा सरकारले ऋणको साँवा तथा ब्याज भुक्तानीमा ९८ अर्ब ८७ करोड रुपैयाँ खर्च गरेको छ।
कुल सार्वजनिक ऋणलाई नेपालको जनसंख्याका आधारमा हिसाब गर्दा प्रत्येक नेपालीको भागमा एक लाख रुपैयाँभन्दा बढी ऋणभार पर्न आउँछ। त्यस्तै, मुलुकको कुल गार्हस्थ उत्पादन (जीडीपी) को तुलनामा सार्वजनिक ऋण ४५.५९ प्रतिशत पुगेको छ।
पछिल्लो सात वर्षमा नेपालको सार्वजनिक ऋण दोब्बरभन्दा बढी भएको छ। ऋणको आकार निरन्तर बढ्दै जाँदा त्यसको सदुपयोग, विकास निर्माणमा लगानी र प्रतिफलको विषयमा पनि प्रश्न उठ्न थालेको छ।
सरकारले लिएको ऋण उत्पादनमूलक क्षेत्रमा परिचालन गरी अर्थतन्त्रलाई बलियो बनाउने कि ऋणको साँवा र ब्याज तिर्नै राज्यको ठूलो स्रोत खर्च गर्ने भन्ने विषय अहिले गम्भीर बहसको विषय बनेको छ।
