तिहारमा स्वदेशी सयपत्रीको बाढी: बाहिरबाट फूल आयातमा रोक लगाउन आग्रह
कार्तिक १२। तिहार पर्व नजिकिँदै गर्दा नेपाली बजारमा फूलको माग धान्न सक्ने गरी स्वदेशमै सयपत्री फूलको उत्पादन उल्लेख्य रूपमा बढेको छ। विभिन्न जिल्लाहरूमा गरिएको स्थलगत रिपोर्टिङका क्रममा युवा उद्यमीहरूले व्यावसायिक रूपमा ठूलो परिमाणमा सयपत्री खेती गरेको पाइएको ‘कृषि प्रेस’ का सञ्चालक अशोकबहादुर टण्डनले बताएका छन्।
यस वर्ष स्वदेशी उत्पादनले नै बजारको माग पूर्ण रूपमा धान्ने अवस्था रहेकाले भारत वा अन्य मुलुकबाट फूलमाला आयात गर्न पूर्ण रूपमा रोक लगाउनुपर्नेमा उनले जोड दिएका छन्। विशेषगरी प्लास्टिक र कृत्रिम (प्लास्टिकका) मालाहरूको आयातले वातावरणमा असर पार्नुका साथै स्वदेशी उत्पादनलाई समेत ओझेलमा पार्ने भएकाले त्यसमाथि कडा प्रतिबन्ध लगाउन सम्बन्धित निकायसँग उनको आग्रह छ।
विदेशबाट आयातित फूलमालाका कारण वर्षभरि पसिना बगाउने नेपाली किसानहरूले उचित मूल्य नपाउने र मारमा पर्ने अवस्था अन्त्य गर्नुपर्ने टण्डनको भनाइ छ। स्वदेशी किसानको कडा मेहनत र पसिनाको सम्मान गर्दै यस वर्षको तिहारमा पूर्ण रूपमा स्थानीय स्तरमा उत्पादित फूल तथा माला मात्रै प्रयोग गर्न उनले सम्पूर्ण उपभोक्ताहरूलाई विशेष अपील गरेका छन्।
