.JPG)
नाराबाजीका बीच सरकारको नीति तथा कार्यक्रम पारित
काठमाडौं । सभामुख देवराज घिमिरेले आर्थिक वर्ष २०८१।०८२ को नेपाल सरकारको वार्षिक नीति तथा कार्यक्रम बहुमतले पारित भएको घोषणा गरेका छन्
। आइतबार प्रतिनिधि सभाको बैठकमा विपक्षी दल नेपाली कांग्रेसले विरोध जनाए पनि नीति तथा कार्यक्रम बहुमतले पारित भएको घोषणा गरिएको हो ।
उनले भने, ‘राष्ट्रपतिले २०८१ जेष्ठ १ गते मंगलबार संघीय संसदको दुवै सदनको संयुक्त बैठकमा गर्नु भएको सम्बोधनमा उल्लेखित आर्थिक वर्ष २०८१।०८२ को नेपाल सरकारको वार्षिक नीति तथा कार्यक्रम बहुमतले पारित भएको घोषणा गर्दछु ।’
जेष्ठ १५ गते दिनको १ बजे संयुक्त बैठकमा नेपाल सरकारको अर्थमन्त्रीले आर्थिक वर्ष २०८१।०८२ को राजस्व र व्ययको वार्षिक अनुमान पेश गर्ने कार्यसूची पनि रहेको छ । उनले भने, ‘संघीय संसदको दुवै सदनको संयुक्त बैठकमा नेपाल सरकारको अर्थमन्त्रीले आर्थिक वर्ष २०८१।०८२ को राजस्व र व्ययको वार्षिक अनुमान पेश गर्नुपर्ने भएकोले सोही मितिमा दिनको १ बजे बैठक बस्ने गरि संयुक्त बैठक हुनेछ ।’यसको साथै सदनको बाँकी कार्यक्रम कार्यसूचीबाट हटाएर अर्को बैठक जेष्ठ १५ गते दिनको ४ बजे बस्नेगरि आइतबारको बैठक स्थगित भएको छ ।
