वैदेशिक रोजगार विभागको अरबौँ रकम राख्न बैंकलाई सूचना
काठमाडौँ, २१, चैत्त । वैदेशिक रोजगार विभागले धरौटी बापतको तीन अर्ब ५३ करोड रुपैयाँ निक्षेपको रुपमा बैंकको मुद्दती खातामा पुनः जम्मा गर्ने भएको छ ।
यसअघि विभिन्न वाणिज्य बैंकहरुको मुद्दती खातामा राखेको रकम यही चैत ३० गते परिपक्व हुदैँ गर्दा विभागले फेरी निक्षेपको रुपमा बैंकमा जम्मा गर्न लागेको हो । मंगलबार सूचना प्रकाशित गर्दै विभागले नेपाल राष्ट्र बैंकबाट इजाजत प्राप्त ‘क’ वर्गका इच्छुक वाणिज्य बैंकहरुलाई आफूले लिन चाहेको रकम तथा उचित ब्याजदरसहित प्रस्ताव पेश गर्न भनेको छ ।
साथै, निक्षेप गर्न चाहने बैंकले ब्याजदरलगायत अन्य विवरणसहितको दरभाउपत्र फाराम भरेर यही चैत २७ गते दिउँसो ३ बजेसम्म प्रस्ताव पेश गर्न सक्ने सूचनामा उल्लेख छ ।
