पोखरा विमानस्थललाई अन्तर्राष्ट्रियसँगै घरेलु हवाई हब बनाउनुपर्ने आवश्यकता
असोज १२। पोखरालाई सातै प्रदेशका प्रमुख सहरसँग नियमित आन्तरिक उडानमार्फत जोड्न सके अन्तर्राष्ट्रिय विमानस्थलको उपयोगिता अझ बढ्न सक्छ। अहिले पोखराबाट प्रत्यक्ष आन्तरिक हवाई कनेक्टिभिटी सीमित रहेकाले दुबईलगायत अन्तर्राष्ट्रिय गन्तव्यतर्फ यात्रा गर्ने यात्रु मुख्यतः गण्डकी प्रदेशमै सीमित हुने अवस्था देखिन्छ। पोखरालाई देशका विभिन्न प्रमुख सहरसँग जोड्ने बलियो Domestic Network निर्माण गर्न सके देशभरका यात्रुले पोखरा हुँदै अन्तर्राष्ट्रिय यात्रा गर्न सक्ने आधार बन्न सक्छ।
अन्तर्राष्ट्रिय उडान सञ्चालनमा ल्याउनु पहिलो कदम भए पनि त्यसलाई यात्रु उपलब्ध गराउने प्रभावकारी आन्तरिक सञ्जाल विस्तार गर्नु अबको महत्वपूर्ण आवश्यकता हो। दुबईमार्फत २५० भन्दा बढी अन्तर्राष्ट्रिय गन्तव्यसँग जोडिने सम्भावना रहेको पोखरालाई आन्तरिक हवाई हबका रूपमा समेत विकास गर्न सके पर्यटन, व्यापार र यात्रु आवागमनमा थप सहजता ल्याउन सकिने अपेक्षा गरिएको छ।
