शरद् ऋतुमा १८ हिमाल आरोहणका लागि ६३७ जनाले लिए अनुमति
असोज १३। सन् २०२६ को शरद् ऋतुमा नेपालका १८ वटा हिमाल आरोहणका लागि ६८ टोलीका ६३७ आरोहीले अनुमति लिएका छन्। अनुमति लिनेमा ४७४ पुरुष र १६३ महिला रहेका छन्।
आरोहण अनुमति शुल्कबापत पर्यटन विभागले १५ लाख ६८ हजार ७३४ अमेरिकी डलर अर्थात् रु २३ करोड ८५ लाख १७ हजार ७९७ रोयल्टी सङ्कलन गरेको जनाएको छ।
यस सिजनमा सबैभन्दा बढी आकर्षण ८,१६३ मिटर अग्लो मनास्लु हिमालमा देखिएको छ। मनास्लु आरोहणका लागि मात्रै ४३ टोलीका ५०० आरोहीले अनुमति लिएका छन्। मनास्लुबाट मात्र विभागले रु २२ करोड ५८ लाख ५७ हजार १८९ रोयल्टी प्राप्त गरेको छ।
त्यस्तै, धौलागिरि–१ का लागि ३४ जना, पुथा हिउँचुलीका लागि २० जना, डाङ्गा हिउँचुलीका लागि १६ जना र बरुणत्सेका लागि १० जनाले अनुमति लिएका छन्।
मकालु, गङ्गापूर्णा पश्चिम (लाङचेनेल), थोरोङ पिक, नोर्बु खाङ, अन्नपूर्ण–४, चाम्लाङ, लमजुङ हिमाल, पुमोरी, सारिबुङ, थापा पिक, पोखर खाङ, अर्दाङ र पेरीलगायत हिमालमा पनि आरोहण अनुमति जारी गरिएको विभागले जनाएको छ।
