मैथिली साहित्यले गुमायो एक वरिष्ठ स्रष्टा
२१ भदौ । वरिष्ठ मैथिली साहित्यकार तथा समालोचक डा. रेवतीरमण लालको ८३ वर्षको उमेरमा निधन भएको छ। जनकपुरधाम उपमहानगरपालिका–११ स्थित आफ्नै निवासमा शनिबार राति उनको निधन भएको हो। मैथिली साहित्यमा लामो समय योगदान दिएका लालले कथा, कविता, गीत, लेख, पटकथा, यात्रा वृत्तान्त र लोकसाहित्यलगायत विभिन्न विधामा कलम चलाएका थिए। उनको पहिलो प्रकाशित मैथिली रचना ‘सरस्वती वन्दना’ सन् १९६० मा प्रकाशित भएको थियो। ‘साक्षात्कार’, ‘माधव नहि अएला मधुपुरसँ’, ‘हमर विदेश भ्रमण’, ‘महाकवि विद्यापति’ र ‘खिस्सा पिहानी’ उनका चर्चित कृतिमा पर्छन्। मैथिली त्रैमासिक **‘नैमिकानन’**का सम्पादकसमेत रहेका लालले साहित्य क्षेत्रमा पुर्याएको योगदानका लागि मिथिला रत्न, ज्योतिरीश्वर साहित्य सम्मान तथा प्रादेशिक प्रतिभा पुरस्कारलगायत सम्मान प्राप्त गरेका थिए।
