अर्थमन्त्री खनाल: ‘लोकतन्त्र संस्थागत गर्न निर्वाचन अपरिहार्य’
काठमाडौँ- अर्थमन्त्री खनाल: ‘लोकतन्त्र संस्थागत गर्न निर्वाचन अपरिहार्य’
अर्थमन्त्री रामेश्वर खनालले लोकतन्त्रलाई मजबुत बनाउन निर्वाचन अनिवार्य रहेको बताएका छन्।
आइतबार काठमाडौंमा आयोजित नेपाल आर्थिक पत्रकार समाज (नाफिज) को १६औँ वार्षिक साधारणसभामा बोल्दै उनले सरकारले पूरा गर्नुपर्ने तीन प्रमुख दायित्वमध्ये एक निर्वाचन रहेको स्पष्ट पारे।
उनका अनुसार निर्वाचनको मिति सार्नु मुलुकलाई अनिश्चिततामा धकेल्ने कदम हो, जसले विशेषगरी युवालाई निराश बनाउँछ।
खनालले मुलुक परिवर्तनको संघारमा रहेको तर वास्तविक परिवर्तन अझै नआएको उल्लेख गर्दै, जेनजी आन्दोलनले देशमा आर्थिक समृद्धि भन्दा भ्रष्टाचार अन्त्य र सुशासन स्थापना को माग उठाएको बताए।
उनले भने—
“परिवर्तनको लहर छ, तर त्यो गलत दिशामा नजाओस् भन्न निर्वाचन समयमा हुनुपर्छ।”
“जेनजी आन्दोलनको मूल मर्म दुईवटा मात्र: भ्रष्टाचार नियन्त्रण र सुशासन।”
“तत्कालीन सरकारले आन्दोलनका घटनापछि जिम्मेवारी त्याग्यो, नयाँ सरकार गठन भयो, अब तेस्रो जिम्मेवारी निर्वाचन सम्पन्न गर्नु हो।”
खनालले संविधानले तोकेको समयमा निर्वाचन सम्पन्न गर्नु सरकारको दायित्व मात्र नभई सबै नागरिकको साझा अभियान भएको उल्लेख गरे।
