प्रधानमन्त्री ओलीको मिडियामाथि आलोचना: नेपाली भाषाको सम्मानमा कमी आएको आरोप
काठमाडौँ - प्रधानमन्त्री केपी शर्मा ओलीले मिडियामा नेपाली भाषाको सम्मानमा कमी आएको भन्दै असन्तुष्टि व्यक्त गरेका छन्। गोरखापत्र दैनिकको १२५औं वार्षिकोत्सवको अवसरमा आयोजित विशेष कार्यक्रममा बोल्दै उनले मिडियाले नेपाली भाषामा प्रयोग हुने सम्मानार्थी शब्दहरूको प्रयोगमा लापरवाही गरेको आरोप लगाए।
प्रधानमन्त्री ओलीले भने, "अहिलेको मिडियामा तल्लो स्तरको भाषा प्रयोग भइरहेको छ।" उनले नेपाली भाषामा अनेक सम्मानार्थी शब्दहरू रहेको भन्दै, "हजुरबुबा र नातीका लागि एउटै भाषा प्रयोग गर्न नहुने हो," भने। उनले मिडियामा अंग्रेजी भाषाको नक्कल गरेर नेपाली भाषाको कद घटाउन नहुनेमा जोड दिए।
