नेकपा माओवादी केन्द्रको पदाधिकारी बैठक आज खुमलटारमा बस्दै
काठमाडौँ - नेकपा माओवादी केन्द्रका अध्यक्ष पुष्पकमल दाहाल 'प्रचण्ड'ले आज आइतबार दिउँसो १ बजे आफ्नो निजी निवास खुमलटारमा पार्टीको पदाधिकारी बैठक बोलाएका छन्। बैठकमा समसामयिक राजनीतिक विषयहरू, हुलाकी मार्ग केन्द्रित तराई–मधेस जागरण अभियानको समीक्षा र आगामी हिमाली तथा पहाडी मार्गमा सञ्चालन हुने अभियानका विषयमा छलफल हुने बताइएको छ।
पार्टीका उपमहासचिव मात्रिका यादवका अनुसार, बैठकमा फागुन १२ गतेदेखि सुरु भएको तराई–मधेस जागरण अभियानको समिक्षा, आगामी अभियानका रणनीतिहरू र समसामयिक राजनीतिक परिस्थितिका बारेमा छलफल हुनेछ। यस अभियानअन्तर्गत एक करोडभन्दा बढी जनताको प्रत्यक्ष र परोक्ष संवाद भएको दाबी गरिएको छ।
यसअघि, पुस २३ गतेको केन्द्रीय समिति बैठकले हुलाकी मार्ग केन्द्रित अभियान सञ्चालन गर्ने निर्णय गरेको थियो।
