दुगड बने प्रधानमन्त्रीका विशेष आर्थिक सल्लाहकार
एक महिनाअघि मात्र उद्योग, वाणिज्य तथा आपूर्ति राज्यमन्त्रीबाट बिदा पाएका मोतीलाल दुगडलाई सरकारले प्रधानमन्त्रीको विशेष आर्थिक सल्लाहकारमा नियुक्त गरेको छ ।
राज्यमन्त्री पदबाट मुक्त भएपछि विराटनगर आएर आफ्नो उद्योग–व्यापार सह्मालिरहेका दुगडलाई आइतबार प्रधानमन्त्रीको विशेष आर्थिक सल्लाहकारमा नियुक्त गरिएको हो । यसअघि उक्त पदमा पूर्वअर्थमन्त्री युवराज खतिवडा थिए । खतिवडा अमेरिकाका लागि राजदूत नियुक्त भएपछि प्रधानमन्त्रीको विशेष आर्थिक सल्लाहकार पद खालि थियो ।
नेपाल सरकारको मन्त्री सरहको सुविधा पाउने गरी दुगडलाई उक्त पदमा नियुक्त गरिएको हो ।
उद्योगपति दुगडले आइतबार दिउँसो आफूले नियुक्ति पत्र पाएको जानकारी दिए । उनी आइतबार साँझ राजधानी पुगिसकेका छन् ।
आफूले राज्यमन्त्री पदमा छँदा सबैलाई समेटेर सबैको काम गरिदिने इमानदार प्रयास गरेको र अहिले त्यही इमानको मूल्याङ्कन भएको उनले प्रतिक्रिया दिए । यससँगै, मुलुकमा औद्योगिक र व्यापारिक वातावरणलाई सहज बनाउन आफूले भूमिका निर्वाह गर्ने दुगडले बताए ।
