काठमाडौं क्लाइमेट विक १६ बुँदे घोषणासहित सम्पन्न
असोज १९। काठमाडौंमा अक्टोबर २ देखि ४ सम्म आयोजना भएको Kathmandu Climate Week 2026 १६ बुँदे प्रतिबद्धता सार्वजनिक गर्दै सम्पन्न भएको छ। जलवायु परिवर्तनका कारण नेपाल तथा हिमाली क्षेत्रमा बढ्दै गएको जोखिम, जलवायु न्याय, अनुकूलन तथा उत्थानशीलताका विषयलाई केन्द्रमा राखेर कार्यक्रम आयोजना गरिएको थियो।
कार्यक्रममा जलवायु परिवर्तनको प्रभाव न्यूनीकरणसँगै जलवायु जोखिममा रहेका समुदायको संरक्षण, अनुकूलन क्षमता अभिवृद्धि र जलवायु न्याय सुनिश्चित गर्ने विषयमा विशेष जोड दिइएको थियो। हिमाली देशका रूपमा नेपालले भोगिरहेको हिमपातको ढाँचा परिवर्तन, हिमनदी पग्लिने क्रम, बाढी–पहिरो तथा अन्य प्राकृतिक जोखिमलाई अन्तर्राष्ट्रिय तहमा प्रभावकारी रूपमा उठाउनुपर्ने आवश्यकता पनि औँल्याइएको थियो।
काठमाडौं क्लाइमेट विकमा सरकारी निकाय, विज्ञ, अनुसन्धानकर्ता, नागरिक समाज, युवा तथा विभिन्न क्षेत्रका प्रतिनिधिहरूको सहभागिता रहेको थियो। छलफलमा जलवायु वित्त, हरित अर्थतन्त्र, स्वच्छ ऊर्जा, प्रकृति संरक्षण, जलवायु अनुकूलन र विपद् जोखिम न्यूनीकरण जस्ता विषयमा विचार आदानप्रदान भएको थियो।
कार्यक्रमको समापनसँगै सार्वजनिक गरिएको १६ बुँदे प्रतिबद्धताले नेपालमा जलवायु परिवर्तनसँग जुध्न स्थानीयदेखि अन्तर्राष्ट्रिय तहसम्म सहकार्य आवश्यक रहेको सन्देश दिएको छ। विशेषगरी जलवायु जोखिमबाट बढी प्रभावित समुदायसम्म स्रोत र प्रविधिको पहुँच पुर्याउने तथा जलवायु परिवर्तनलाई विकास योजनासँग जोडेर अघि बढाउने विषयमा जोड दिइएको छ।
काठमाडौं क्लाइमेट विकको निष्कर्षलाई आगामी COP31 लगायत अन्तर्राष्ट्रिय जलवायु मञ्चमा नेपालको प्राथमिकता र हिमाली क्षेत्रका सवाल प्रस्तुत गर्ने आधारका रूपमा समेत हेरिएको छ। नेपालले जलवायु परिवर्तनको प्रभाव भोग्ने मात्र नभई समाधानका लागि अन्तर्राष्ट्रिय समुदायसँग सहकार्य गर्ने प्रतिबद्धता पनि दोहोर्याएको छ।
