हिमलुङ हिमपहिरोमा थप ३ शव भेटिए, ७ जनाको मृत्यु, ९ नेपाली अझै बेपत्ता
असोज १५ । मनाङस्थित हिमलुङ हिमालमा सेप्टेम्बर २७ मा गएको हिमपहिरोमा थप तीन जनाको शव फेला परेको छ। पछिल्लो खोजी तथा उद्धार अभियानका क्रममा तीन शव भेटिएसँगै हिमपहिरोमा मृत्यु हुने नेपालीको संख्या ७ पुगेको छ भने ९ जना अझै बेपत्ता रहेका छन्। यसअघि चार जनाको शव फेला परिसकेको थियो। बेपत्ता भएकाहरू हिमाल आरोहणका लागि आधार शिविर तयार गर्ने क्रममा खटिएका आरोहण सहयोगी तथा अन्य कर्मचारी रहेको जनाइएको छ।
नयाँ फेला परेका शवहरू गोरखाका आश गुरुङ, खोटाङका सुरज राई र रुकुमका कलाम बुढाका रहेको जिल्ला प्रशासन कार्यालय मनाङले जनाएको छ। शवहरू हिमलुङ आधार शिविरबाट सदरमुकाम चामे ल्याइसकिएको र थप आवश्यक प्रक्रियाका लागि काठमाडौं पठाउने तयारी गरिएको छ। बेपत्ता भएकामध्ये सात जना हिमालयन होलिडेजसँग र दुई जना इम्याजिन नेपालसँग सम्बन्धित रहेको बताइएको छ।
हिमपहिरोपछि नेपाल राष्ट्रिय पर्वतीय पथप्रदर्शक संघको नेतृत्वमा अनुभवी पर्वत गाइडहरूको टोलीले खोजी तथा उद्धार कार्य जारी राखेको छ। गहिरो हिउँमा पुरिएका व्यक्तिको खोजी चुनौतीपूर्ण भए पनि बाँकी बेपत्ताको अवस्था पत्ता लगाउन र शवहरू फेला पार्न सम्भव सबै प्रयास भइरहेको जनाइएको छ।
