दुबईबाटै घरको ठेगानामा पासपोर्ट डेलिभरी हुने
असोज ९। नेपाली महावाणिज्यदूतावास, दुबईले नयाँ बनेर आएका राहदानी (पासपोर्ट) सम्बन्धित आवेदककै ठेगानामा डेलिभरी गर्ने व्यवस्था गरेको छ। दूतावासका अनुसार अब नयाँ राहदानी लिन कार्यालयमै उपस्थित हुनुपर्ने बाध्यता हट्दै इमिरेट्स पोस्टमार्फत आवेदकले उपलब्ध गराएको ठेगानामै पासपोर्ट पठाइने व्यवस्था गरिएको हो। यसबाट यूएईमा रहेका नेपाली सेवाग्राहीलाई राहदानी लिन दूतावाससम्म पुग्नुपर्ने समय र झन्झट कम हुने अपेक्षा गरिएको छ। नयाँ राहदानी प्राप्त भएपछि सम्बन्धित आवेदकको ठेगानामा पठाउने प्रक्रियालाई सहज बनाउन इमिरेट्स पोस्टको सेवा प्रयोग गरिएको हो।
