जापानमा टाइफुन डुजुआनको कहर, ९ जनाको मृत्यु, ४ जना बेपत्ता
असोज ७। जापानमा आएको शक्तिशाली टाइफुन डुजुआनका कारण भारी वर्षा, बाढी र पहिरोमा परी कम्तीमा ९ जनाको मृत्यु भएको छ भने ४ जना अझै बेपत्ता छन्। स्थानीय अधिकारीका अनुसार चिबा प्रिफेक्चरमा ६ जना र कानागावामा ३ जनाको मृत्यु भएको हो।
टाइफुनका कारण पूर्वी जापानका विभिन्न क्षेत्रमा ठूलो वर्षा हुँदा सडक तथा बस्तीहरू जलमग्न भएका छन् र करिब ५०० घर प्रभावित वा क्षतिग्रस्त भएका छन्। उद्धार टोलीले बेपत्ता व्यक्तिहरूको खोजी तथा प्रभावित क्षेत्रमा उद्धार कार्य जारी राखेको छ।
इजु द्वीपसमूहको ओशिमामा ४८ घण्टामा ८३२ मिलिमिटर वर्षा रेकर्ड भएको थियो। जापानको मौसम विज्ञान निकायका अनुसार डुजुआन जापानको यस वर्षको २५औँ टाइफुन हो।
