चिलिमे सुरुङमा उद्धारको नयाँ संकेत, १०५ मिटरभित्र चिसो हावा र दोहोरो बहाव
भाद्र २५। चिलिमे सुरुङभित्र जारी खोज तथा उद्धारका क्रममा नयाँ संकेत फेला परेको छ। नेपाली सेनाको उद्धार टोलीबाट प्राप्त पछिल्लो जानकारीअनुसार सुरुङभित्र करिब १०५ मिटर भित्र पुगेपछि बाहिरपट्टिबाट चिसो हावा आएको र हावाको दोहोरो बहाव महसुस भएको छ। यसले सुरुङभित्र हावा आवतजावत भइरहेको संकेत देखाएको उद्धार टोलीको भनाइ छ। सुरुङभित्र फसेका व्यक्तिहरूको अवस्थाबारे यकिन जानकारी प्राप्त भइसकेको छैन भने उद्धार टोलीले जोखिमपूर्ण अवस्थामा पनि खोज तथा उद्धार कार्यलाई निरन्तरता दिइरहेको छ। चिसो हावा र दोहोरो हावा बहाव देखिनुलाई उद्धारका क्रममा महत्वपूर्ण संकेतका रूपमा हेरिएको छ।
