२३ जिल्लामा बाढीको मध्यम जोखिम, नदी–खोला आसपास सतर्क रहन आग्रह
भाद्र २५। जल तथा मौसम विज्ञान विभागले देशका २३ जिल्लामा बाढीको मध्यम जोखिम रहेको जनाएको छ। पछिल्लो समय भइरहेको वर्षाका कारण विभिन्न नदी, खोला तथा खोल्साहरूमा पानीको बहाव बढ्न सक्ने भएकाले बाढी तथा डुबानको जोखिम बढेको हो। विभागले विशेषगरी नदी तथा खोला आसपासका बस्ती, सडक क्षेत्र र तल्लो भूभागमा बसोबास गर्ने नागरिकलाई उच्च सतर्कता अपनाउन आग्रह गरेको छ। अचानक पानीको सतह बढ्न सक्ने भएकाले नदी तथा खोलामा माछा मार्ने, पौडी खेल्ने वा अनावश्यक रूपमा आवतजावत नगर्न पनि सुझाव दिइएको छ। साथै, स्थानीय प्रशासन तथा सम्बन्धित निकायलाई सम्भावित जोखिमलाई ध्यानमा राख्दै आवश्यक तयारी अवस्थामा रहन आग्रह गरिएको छ।
