‘लाङटाङ खोला’को सुरुङबाट दुई शव निकालियो, बेपत्ताको खोजी जारी
बिहीबार, १८ । रसुवाको लाङटाङ खोला जलविद्युत् आयोजनाको सुरुङबाट नेपाली सेनाको उद्धार टोलीले दुई जनाको शव निकालेको छ। बिहीबार सुरुङभित्र खोजी तथा उद्धारका क्रममा दुई शव फेला पारेर बाहिर निकालिएको आयोजनाका महाप्रबन्धक विजयमणि भट्टराईले जानकारी दिएका छन्।
बुधबार हाइड्रो–मेकानिकल इन्जिनियरसहित ७–८ जनाको प्राविधिक टोली खाली पेनस्टक पाइपभित्र प्रवेश गरी करिब १५० मिटर माथिसम्म पुगेर वैकल्पिक बाटो तयार गरेको थियो। सोही बाटो प्रयोग गरेर सेनाको टोलीले दुई शव बाहिर निकालेको हो।
यसअघि सुरुङको मुख्य प्रवेशमार्गबाट उद्धार टोली भित्र पस्ने प्रयास गरेको थियो। तर ढुंगा, माटो र लेदो भरिएका कारण करिब १०० मिटरभित्र पुगेपछि थप अघि बढ्न सकेको थिएन। सुरुङभित्र अझै अन्य व्यक्ति फसेको आशंका रहेकाले खोजी तथा उद्धार कार्य जारी छ।
२० मेगावाट क्षमताको लाङटाङ खोला जलविद्युत् आयोजनामा अझै ठूलो संख्यामा कर्मचारी सम्पर्कविहीन रहेको विभिन्न पछिल्ला विवरणमा उल्लेख छ। तथ्यांक भने उद्धारसँगै अद्यावधिक भइरहेको देखिन्छ।
