तिब्बतको बाढी प्रभावित क्षेत्रमा सडक पुनः सञ्चालन, उद्धार टोलीलाई सहज
भाद्र १७। नेपालसँग जोडिएको ग्यिरोङ सीमा नाकातर्फ जाने जी–२१६ राष्ट्रिय राजमार्ग बाढी र पहिरोका कारण क्षतिग्रस्त भएपछि अवरुद्ध भएको सडक बुधबार पुनः सञ्चालनमा आएको छ। सडक खुलेसँगै उद्धार टोली, राहत सामग्री र आवश्यक उपकरणलाई बाढी प्रभावित क्षेत्रको मुख्य भागसम्म स्थलमार्गबाटै पुर्याउन सहज भएको छ।
चीनले निरन्तर वर्षा र कठिन भौगोलिक अवस्थाबीच सडक मर्मत गरेको हो। सडक खुलेपछि ठूला मेसिन, खोज तथा उद्धार उपकरण र उद्धार टोली प्रभावित क्षेत्रमा प्रवेश गरेका छन्, जसले बेपत्ता व्यक्तिहरूको खोजीलाई थप प्रभावकारी बनाउने अपेक्षा गरिएको छ।
