काठमाडौँमा खानेपानी संकट: मेलम्चीको मुहानमा बाढी आउँदा आपूर्ति पूर्ण रूपमा ठप्प
काठमाडौँ। अविरल मनसुनी वर्षासँगै सिन्धुपाल्चोकको हेलम्बुस्थित मेलम्ची खानेपानी आयोजनाको मुहान क्षेत्रमा भीषण बाढी आएपछि काठमाडौँ उपत्यकामा खानेपानीको आपूर्ति पूर्ण रूपमा ठप्प भएको छ। लगातारको वर्षाले गर्दा आयोजनाको हेडवर्क्स क्षेत्रमा रहेको अस्थायी बाँध (ड्याम) मा क्षति पुगेपछि काठमाडौँ उपत्यका खानेपानी लिमिटेड (KUKL) ले आजैदेखि लागू हुने गरी पानी वितरण अस्थायी रूपमा बन्द गरेको हो।
आयोजना स्थलमा खटिएका प्राविधिक टोलीका अनुसार मुख्य समस्या नदीमा बढेको लेदो र अत्यधिक धमिलो पानी हो, जसका कारण सुन्दरीजलस्थित प्रशोधन केन्द्रमा पानी शुद्धीकरण गर्ने प्रक्रिया पूर्ण रूपमा जटिल बनेको छ। २६ किलोमिटर लामो मुख्य सुरुङ मार्गभित्र बालुवा र लेदो भरिएर गम्भीर क्षति नहोस् भन्नका लागि अधिकारीहरूले बिहीबार राति नै सुरुङको मुख्य ढोका (गेट) बन्द गरेका थिए।
मेलम्ची खानेपानी विकास समितिका अनुसार अहिले पनि मुहान क्षेत्रमा नदीको बहाव घटिसकेको छैन। वर्षा निरन्तर भइरहेकाले मुहान सफा हुन र क्षतिग्रस्त संरचनाको मर्मत सम्भार गर्न केही समय लाग्ने देखिएको छ। नियमित आपूर्ति सुरु हुन अझै केही दिन लाग्न सक्ने भएकाले केयूकेएलले उपभोक्ताहरूलाई संकलन गरी राखिएको पानी मित्वयी ढंगले प्रयोग गर्न र वैकल्पिक उपायहरू अपनाउन विशेष आग्रह गरेको छ।
