मन्त्री हेरफेरको चर्चा बीच देउवाको बुढानीलकण्ठमा कांग्रेस बैठक, सरकारप्रति असन्तुष्टि चुलिँदै
काठमाडौं । प्रधानमन्त्री केपी शर्मा ओली नेतृत्वको सरकारमा मन्त्री हेरफेरको चर्चा चुलिँदै जाँदा सत्ता साझेदार नेपाली कांग्रेसले शुक्रबार पदाधिकारी बैठक बोलाएको छ। सभापति शेरबहादुर देउवाको निवास बुढानीलकण्ठमा जारी बैठकमा पार्टीका शीर्ष नेतासहित सरकारमा रहेका मन्त्रीहरू सहभागी छन्।
बैठकमा गृहमन्त्री रमेश लेखक, कृषिमन्त्री रामनाथ अधिकारी, ऊर्जामन्त्री दीपक खड्का, नेताहरू शेखर कोइराला, बालकृष्ण खाँणलगायत पदाधिकारी सहभागी छन्।
सरकारप्रति कांग्रेसभित्र चर्किंदो असन्तुष्टिका बीच सभापति देउवाले मन्त्रीहरूलाई समेत सहभागी गराएर समीक्षा बैठक राखेका हुन्। बैठकमा पार्टीभित्रको आन्तरिक गतिविधि, एमालेसँगको गठबन्धनको प्रभावकारिता, सरकारमा कांग्रेसको भूमिका र पछिल्लो राजनीतिक घटनाक्रमबारे छलफल भइरहेको जनाइएको छ।
पार्टीभित्र कतिपय नेताहरू सरकारको कार्यशैलीप्रति खुलेरै असन्तुष्टि जनाइरहेका छन्। नेता शेखर कोइरालाले त वर्तमान सरकारको विकल्पमा विपक्षी दलहरूसँग छलफलसमेत अघि बढाएका छन्। यस्तो बेला सभापति देउवा भने संयमतापूर्वक गठबन्धनलाई कायम राख्न प्रयत्नशील देखिएका छन्।
बैठकको निष्कर्षले आगामी दिनमा कांग्रेसको सरकारभित्रको भूमिकासँगै गठबन्धनको स्थायित्वमा समेत असर पार्न सक्ने अनुमान गरिएको छ।
