राजसंस्था पुनर्स्थापनाका लागि संयुक्त जनआन्दोलन समितिको अनिश्चितकालीन आन्दोलनको घोषणा
काठमाडौँ - व्यवस्थाप्रति असन्तुष्ट राजावादी समूह ‘राजसंस्था पुनर्स्थापनाका लागि संयुक्त जनआन्दोलन परिचालन समिति’ले आगामी जेठ १५ गतेदेखि अनिश्चितकालीन आन्दोलनको घोषणा गरेको छ। समितिका संयोजक नवराज सुवेदी नेतृत्वमा गठित यस समूहले शान्तिपूर्ण आन्दोलनमार्फत संवैधानिक राजसंस्थासहितको प्रजातन्त्र स्थापना, हिन्दुराष्ट्रको पुनर्स्थापना, र दुई तहको सरकारको पक्षमा संघर्ष गर्ने जनाएको छ।
समितिले १४ बुँदे प्रतिबद्धता सार्वजनिक गर्दै वर्तमान व्यवस्थाले देशलाई निकास नदिने निष्कर्षमा पुगेको जनाएको छ। यसमा सबै विचारधारा र शक्तिहरू हटाउने गरी संवैधानिक राजसंस्थासहितको प्रजातन्त्र स्थापना गर्ने उद्घोष गरिएको छ। साथै, हिन्दुराष्ट्रको पुनर्स्थापना र दुई तहको सरकारको पक्षमा पनि जोड दिइएको छ।
आन्दोलनका कार्यक्रमहरू शान्तिपूर्ण हुने, भद्र अवज्ञा र सत्याग्रह आन्दोलनको स्वरूपमा हुने स्पष्ट गरिएको छ। भ्रष्टाचारप्रति शून्य सहनशीलता कायम गर्दै देशमा सुशासन र कानुनी राज्यको प्रत्याभूति दिलाउने क्रममा २०७४ साल यता सार्वजनिक पदमा रहेकाहरूको सम्पत्ति छानबिन गरी उच्चस्तरीय अधिकार सम्पन्न न्यायिक आयोग गठन गर्ने प्रतिबद्धता पत्रमा उल्लेख छ।
समितिले आन्दोलनलाई सफल तुल्याउन देशको प्रत्येक जिल्ला, पालिका तथा वडाहरूमा संयुक्त जनआन्दोलन समितिहरू गठन गरिने र देशका विभिन्न भागहरूमा स्वतःस्फूर्त रूपले जुलुस, धर्ना लगायतका जनप्रदर्शन हुने जनाएको छ।
