दुई ट्रक आपसमा ठोक्किँदा आगलागी ,धनुषा
काठमाडौँ - धनुषाधाम नगरपालिका वडा नम्बर– ६ मालटोलचोकमा आइतबार बिहान दुईवटा ट्रक आपसमा ठोक्किँदा आगलागी भएको छ। घटनामा एक ट्रक चालकको मृत्यु भएको छ भने अर्का चालक घाइते भएका छन्।
प्रहरीका अनुसार, सिरहाबाट धल्केवरतर्फ जाँदै गरेको ना.६ ख.३४६३ नम्बरको ट्रक र विपरीत दिशाबाट आउँदै गरेको मधेस प्रदेश २–००१ ख.०७१५ नम्बरको ट्रक आपसमा ठोक्किएका थिए। ट्रकको ट्याङ्कीमा ठोक्किएपछि तेल छताछुल्ल भएको थियो, जसका कारण आगो लागेको हो। आगोले ना.६ ख.३४६३ नम्बरको ट्रक पूरै जलेर नष्ट भएको छ।
दुर्घटनामा ना.६ ख.३४६३ नम्बरको ट्रकका चालक सर्लाही लालबन्दी १५ का रोशन कौशल कार्की र अर्का ट्रकका चालक सर्लाही मौलापुरका मुकेशकुमार झा घाइते भएका छन्। उनीहरूलाई जनकपुरस्थित एपोलो अस्पतालमा उपचार भइरहेको छ।
प्रारम्भिक अनुसन्धानका अनुसार, गलत साइडमा एउटा ट्रक प्रवेश गरेपछि दुर्घटना भएको देखिएको छ। यद्यपि, दुर्घटनाबारे विस्तृत अनुसन्धान थालिएको जनकपुर प्रहरी कार्यालयले जनाएको छ।
