काठमाडौँ।  संसदीय सुनुवाइ समितिले सरकारले प्रस्तावित १७ मध्ये १६ राजदूतको नाम पारित गरेको छ। सिंहदरबारमा बसेको समितिको बैठकले विभिन्न देशका लागि प्रस्तावित १६ राजदूतलाई बहुमतले अनुमोदन गरेको हो। श्रीलंकाका लागि प्रस्तावित राजदूत रामकृष्ण भट्टराईको सम्बन्धमा भने केही कागजात अपूरो रहेको भन्दै थप कागजात मगाउन निर्देशन दिएको छ।

समिति सभापति ईश्वरीदेवी न्यौपानेले उजुरीकर्ताहरुको उजुरी, प्रस्तावित राजदूतको स्पष्टीकरण, र कार्ययोजना सुनेर निर्णय लिइएको बताइन्। समितिमा इजरायल, दक्षिण अफ्रिका, र मलेसियाका लागि प्रस्तावित राजदूतहरूमाथि केही फरक मत राखिएको थियो। साथै, भारतका लागि प्रस्तावित राजदूत शंकर शर्माको सम्बन्धमा पनि फरक मत रहेको बताइएको छ।

समावेशिता अपूरो रहेको गुनासोपछि परराष्ट्रमन्त्री डा. आरजु राणा देउवालाई बोलाएर स्पष्टीकरण लिइएको थियो। हाल मधेसी महिला चित्रलेखा यादव र परराष्ट्र सेवाबाट सेवा लम्साललाई सिफारिस गरिएको छ।