काठमाडौँ । पर्वतको कुश्मा नगरपालिका–४ घुम्तीस्थित मध्यपहाडी लोकमार्गको कुश्मा–बागलुङ खण्डमा आज यात्रुवाहक बस र एम्बुलेन्स ठोक्किँदा तीन जना घाइते भएका छन्।

घटनामा परेका सवारी साधनहरूमा नारायणगढबाट बागलुङतर्फ जाँदै गरेको यात्रुवाहक बस (नम्बर: बा प्र ०६–००१ ख ०३००) र म्याग्दीबाट पोखरा जाँदै गरेको एम्बुलेन्स (नम्बर: ग १ झ ६९५) समावेश छन्।

घाइतेहरूमा एम्बुलेन्समा सवार कुश्मा नगरपालिका–१ की ४५ वर्षीया भगवती क्षेत्री, ४९ वर्षीया केशरी अधिकारी, र ५२ वर्षीया गीताकुमारी क्षेत्री रहेका छन्। भगवती क्षेत्रीको अवस्था गम्भीर रहेकोले उनलाई पोखरा अस्पतालमा थप उपचारका लागि पठाइएको छ। अन्य दुई घाइतेको उपचार पर्वत अस्पतालमा भइरहेको छ।

दुर्घटनामा परेकाहरूका अनुसार, ५५ वर्षीया महिला बिरामीलाई पोखरा लैजाने क्रममा यो दुर्घटना भएको हो। जिल्ला प्रहरी कार्यालय पर्वतका प्रहरी नायव उपरीक्षक खुमलाल भुसालले घटनाको विवरण सार्वजनिक गरेका छन्।

दुईवटै सवारी साधन र तिनीहरूको चालक प्रहरीले नियन्त्रणमा राखेका छन् र घटनाको थप अनुसन्धान जारी रहेको जनाइएको छ।