वैदेशिक रोजगार न्यायाधिकरणमा निःशुल्क कानुनी सहायता
काठमाडौँ, २१, पुस । वैदेशिक रोजगार न्यायाधिकरणमा वैदेशिक रोजगारी कसुरसम्बन्धी मुद्दा भएकाले निःशुल्क कानुनी सहायता लिन पाउने व्यवस्था गरिएको छ । न्यायाधिकरणले पैसा तिरेर कानुन व्यवसायी राख्न नसक्ने सेवाग्राहीको न्याय नमरोस् भनेर निःशुल्क कानुनी सहायता लिन पाउने व्यवस्था गरेको हो ।
वैदेशिक रोजगार न्यायाधिकरणले निःशुल्क कानुनी सहायता उपलब्ध गराउने वरिष्ठ अधिवक्ता अभिनाशकुमार प्याकुरेलसहितको ५० जना अधिवक्ताको नाम र सम्पर्क नम्बरको सूची सार्वजनिक गरेको छ ।
न्यायाधिकरणले वैदेशिक रोजगार कसुर मुद्दाका असमर्थ पक्षले निःशुल्क रूपमा सेवा लिन सक्ने गरी सो व्यवस्था गरेको जनाएको छ । कानुनी भाषामा यस प्रकारको सेवालाई ‘प्रोबोनो’ सेवा भनिन्छ । न्यायाधिकरणका सूचना अधिकारी दुर्गादत्त लम्सालले प्रोबोनो अर्थात् निःशुल्क कानुनी सहायता लिनुपर्नेले न्यायाधिकरणमा सम्पर्क गरेमा यस प्रकारको व्यवस्था गरिने जानकारी दिनुभयो ।
उहाँका अनुसार न्यायाधिकरणमा दायर भएका वैदेशिक रोजगारीसम्बन्धी मुद्दाका असमर्थ पक्षले अनुरोध गरेपछि मात्र सूचीकृत प्रोबोनो कानुन व्यवसायीमध्येबाट नाम छनोट गर्न लगाइनेछ । असमर्थ पक्षले छनोट गरेका कानुन व्यवसायीलाई उनीहरूको पक्षबाट प्रतिनिधित्व गर्न न्यायाधिकरणले नै लगाउने उहाँको भनाइ छ ।
सूचना अधिकारी लम्सालले न्यायाधिकरणमा प्रोबोनो सेवा गएको भदौदेखि गरिएको र यसमा क्रमशः सङ्ख्या थपिँदै गएको तर यस सेवाका लागि एउटै पनि निवेदन नपरेको जानकारी दिनुभयो ।
